「叱咤江湖」牌匾贈CY
梁振英與網民茶敍不歡而散（黃洋達發言）
黃洋達等網民質問梁振英足本 2012-03-13
[轉載/Youtube] 「皇上」黃洋達噚日帶埋大批手信同狼振英飲茶。振英哥近日間接捲入江湖飯局風波，皇上就托住塊寫上「叱咤江湖」嘅牌匾踩場。佢解釋：「有人嘅地方就有江湖，有句話叫相濡以沫、不如相忘於江湖，幾典雅！」熊公仔：唔好唔要我
作為文化人，皇上希望隻狼了解吓本土文化，帶埋兩本土炮漫畫《古惑仔》同《火紅年代黑骨棠》畀振英哥參透吓。佢仲送咗杜棋峰套《黑社會以和為貴》DVD畀振英哥，希望佢一旦做咗揸fit人，呀，係特首至啱，都可以支持吓本地電影產業。
杜sir套電影，海報有一句「黑社會都有愛國的」，英文名仲叫《Election 2》，夠晒應景！
皇上仲準備咗一隻鬆弛熊公仔，不過隻熊仔揸住塊板，上面寫住「唔好唔要我」，署名係「夢熊」。咁又係嘅，冇事嗰陣，呢隻熊就係振英哥代言人，出咗事，振英哥就立即同佢劃清界線，都幾陰公㗎。
振英哥呢期玩縮沙，唔願出席選舉論壇。不過好多嘢係冇得避嘅，好似佢早排喺 facebook約網民飲茶單嘢咁，個茶敍今晚就要舉行啦。佢呢個茶敍，係邀請 11位喺 fb得到最多 like嘅網民出席。結果顯示，綽號「皇上」嘅電影編劇、網台節目主持人黃洋達同佢太太陳秀慧都多人 like，今晚可以當面向振英哥反映民意！
