[時事] 2011 搞笑之最! 2011 狂想曲!

2012豬狼輸晒 是旦男報道?( 2011-12-31 )
2012狂想曲


2011搞笑之最!( 2011-12-30 )
2011政壇動物農莊


[轉載/Youtube] 話咁快就要告別2011。有人話,今年係國際間天崩地裂嘅一年;八方就覺得,今年亦係香港政壇蛻變成動物農莊嘅一年。先係民主元老華叔病逝,駕鶴西遊;冇幾耐由煲呔至陳鑑林等權貴都被揭變咗寄居蟹橫行僭建霸地。香港最珍惜嘅人權、集會自由畀隻禿鷹啄食。阿爺啲又變咗一隻隻黃牛,潛伏各區深耕種票。呢個動物農莊,未來仲會交畀隻豬或者隻狼打骰,但全港99.98%嘅人類,係冇份做決定㗎!就等八方同大家回顧一下呢場香港政壇退化史。

豺狼扮羊 開期票爭特首
邊個夠佢狼?狼振英向來以心狠手辣見稱,話過N屆唔選特首,到最後咪一樣露出狼子野心,係都要出嚟同隻豬片過。狼振英點樣老奸巨猾?大家問吓班城大教職員咪知道囉。再唔係,問吓佢對六四立場吖,包佢立即現形。
呢隻狼今年披上羊皮,靠把口冧盡唔少港人,又話支持復建居屋、又話會「認認真真」處理退休保障問題,所以佢民望慢慢升高。但佢再奸都不敵中央屠狼,事關阿爺操控住選委會選舉,狼營喺小圈子戰役大敗,搞到佢要狼急跳入中聯辦嗌救命。勢估唔到隻狼先係2012冇雙普選嘅最大受害者。

龍豬獻世 亂噏當秘笈
豬者,唐唐也,佢辭職後宣佈參選特首後,出席過大小嘅論壇、落區做騷,每次都表現差劣,每次都令人慘不忍睹。佢嘅出現,打破家長深信龍年出世必定醒嘅迷思。
唐唐豬答問題時,不但話不對題、「衫轆拎」等中英夾雜、有時又會用future tense去避重就輕、不着邊際、亂答一通,即使佢唔係豬咁蠢,都應該係豬咁懶,唔做足功課出席論壇做炮灰。
不過,唐唐豬落區嘅趣聞,都唔及佢嘅「感情缺失」咁好睇。原來豬係多情嘅動物。佢辭職前喺官邸拖住老婆承認自己曾經有過「感情缺失」,話自己深感悔疚,並獲老婆諒解同原諒。但唐唐豬有冇私生豬仔、究竟有過幾多段「感情缺失」,至今仍是個謎。

禿鷹惡晒 一哥濫用警力
認住呢隻鷹,人權冇保證。喺11年1月11日上場嘅警隊一哥曾偉雄,一掌權就先動用龐大警力對付菜園村反收地者。但對港鐵工頭撻傷朱凱迪又視而不見喎,充份體現香港警察嗰份「專業」同「人道」精神。
喺3.6反預算案示威,禿鷹部隊大舉拘捕113名示威者。當晚差人施胡椒噴霧噴傷8歲童Joseph,禿鷹竟寸嘴話「維護法紀要道歉係天方夜譚」。到7.1遊行,禿鷹再破記錄拉咗228名示威者。
到咗8月李克強訪港,警隊進駐港大禁錮示威學生李成康、便衣警喺麗港城擋記者鏡頭阻採訪。禿鷹去立法會解畫,竟然講得出警員當時誤以為記者係黑影,伸手擋架時隻手畀部攝錄機卡住咗喎,最終觸發逾300記者上街「反鷹抗暴」!

仙鶴西遊 民主元老辭世
踏入2011年的第二日,香港嘅民主元老、支聯會主席司徒華,因肺癌病逝,化身黃鶴遠去,終年79歲。華叔畢生獻身中國、香港嘅民主事業,風骨峭峻,有8,000市民出席佢嘅公眾追思會。華叔嘅安息禮上,響起「六長四短」鐘聲,象徵佢對平反六四嘅堅持。公義嘅鐘聲,嚇怕咗特區高官,佢哋唔敢到場。
然而大江東去,風波不斷。華叔家人替佢出版嘅《大江東去:司徒華回憶錄》,揭露華叔年輕時同共產黨一段關係,掀起一場質疑書本內容嘅爭論。

猩猩衰鹹濕 採政界小花
最初以為佢係馬(草泥),但耐咗先知佢係隻鹹濕猩猩。八方講緊嘅係被指「身體誠實得很」嘅人民力量任亮憲,佢係2010年底同至今年初捲入兩宗風化案,最終警方指證據不足,即時獲釋。女事主A小姐曾發表文章,形容當日她如何拒絕任亮憲嘅親密舉動,但佢「無法令你(任亮憲)停止下身的操控」。事件令佢「唔死一身潺」,今年去黃大仙參加區議會選舉,佢大比數輸畀工聯會陳婉嫻,救唔番逝去嘅人氣。

寄居蟹橫行 權貴擺明僭建
邊個話香港冇地產霸權?你睇吓煲呔、孫公、陳鑑林等高官權貴,每個月搵得嗰幾十萬銀,無非都係想有個安樂窩之嘛。之但係你睇吓嗰班地產商識起樓咩?搞到佢哋得間千幾呎嘅「蝸居」、得一幢得嗰三層嘅丁屋,點夠佢哋住呀?於是乎,班權貴咪焗住要變身做寄居蟹,透過僭建、霸地去改善居住環境囉。
今年初,《蘋果》先踢爆陳鑑林嘅丁屋豪宅裝修期間霸官地擺貨櫃,間屋仲有僭建。之後環境局副局長潘潔、煲呔喺麥當勞道64號嘅物業都被揭僭建。係咪打橫行?係就係㗎啦,so what?鬼叫呢度係動物農莊!

蠻牛種票 選舉一片紅
回歸以來,阿爺使咗唔少錢,佢班土共馬仔咁多年嚟,好似隻牛辛苦經營,喺多個選區深耕細植,加上種票種到遍地開花,終於解放香港,搞到今屆區選全港選區一片紅。不過,若要人不知,唔好咁低B。《蘋果》好快就踢爆喺美孚南選區,由廣東茂名政協梁平擁有嘅單位,離譜到「1屋7姓13票」。種票牛詭計多端,連拆咗嘅舊樓都可以用嚟種票。種票牛除咗用私伙地址出蠱惑,仲有招屈機必殺技叫「蛇齋餅糉」。種票之外,佢哋更學埋種人,派中聯辦前官員黃春平喺觀塘參選。

Jan:周一嶽奪最受歡迎男歌手
「今年嘅亞太區最受歡迎男歌手係……只要佢一息尚存,大家都忘不了佢嘅周一嶽局長!」過去一年杏林界掀起一片唱歌熱。李家仁醫生憑《小明上廣州》一曲走天涯,風頭一時無兩。到咗中秋,怪醫梁家騮小登科,變身「沙田張學友」大唱《你的名字我的姓氏》冧嬌妻。
嶽少喺年底發功,先憑住獨特嘅粵曲加歌劇唱腔演譯一曲《忘不了你》,YouTube點擊率近20萬,砌低無綫契仔林峯。之後慈善騷、商場騷接過不停,佢越唱越紅,終於攞獎。嶽少發現佢唱歌原來受歡迎過做官,喺2012年向煲呔劈炮,仲向城城拜師學藝走勁歌熱舞路線,準備進軍韓國同阿Rain片過。

Feb:陳淑莊閃電結婚
政壇失意,情場得意;女人四十,特別吸引。踏入2012年,剛失意區議會選舉嘅Tanya陳淑莊重新上路,而且好快就告別剩女生涯,識咗個如意郎君,仲喺2月14日情人節閃電結婚,令唔少宅男同麻甩佬心碎。八方大膽預測,Tanya嘅真命天子會係建制派中人。靚唔靚仔?唔……總之就屬於有才華嗰隻啦。愛情魔力大,結咗婚之後,Tanya成功感召到老公加入泛民陣營,一齊努力爭取普選!

Mar:何俊仁爆冷做特首
真命天子往往另有其人。當全世界預計特首寶座係豬狼之爭時,外形勁似IQ博士宇宙大王嘅民主黨主席何俊仁冷手執個熱煎堆,以601票過半數姿態跑出,力壓只有300及299票嘅唐豬同狼振英,毋須第二輪投票就當選新一屆特首。何俊仁宣佈勝出時仲當眾表演鐵頭功,誓要撞爆小圈子選舉。
仁哥上任後起用民協馮檢基做政務司司長,李卓人做財政司司長,梁家傑做律政司司長。泛民三司齊齊為未來Boss歡呼,宣誓打好呢份工。大熱倒灶,唐唐決意轉戰資訊科技界,開創惡搞短片嘅家族事業;CY加入《星島日報》做記者「贖罪」,大聲追問老闆煙仔何等名人,睇吓佢哋會唔會尷尬難堪。

Apr:劉曉波復活節獲釋
中共十八大換屆前夕,阿爺忽然良心發現,釋放《零八憲章》起草人、諾貝爾和平獎得主劉曉波。
「儲君」習近平接受新華社訪問時,承認中共判劉曉波「莫須有」罪名,坦言事件令佢痛心疾首。
習近平喺正式接班之前,決意特赦,令到原定要到2020年重見天日嘅劉曉波早日重生,一如耶穌受難後復活。
劉曉波獲釋後感謝太太劉霞支持,更加以視像錄影,越洋多謝一直為佢奔波嘅香港政界中人,特別係搞過N次聲援茉莉花遊行嘅社民連。
其他維權人士包括律師高智晟等都即時出獄,同劉曉波一齊被中央委任為全國政治委員,提案要求平反六四、結束一黨專政。

May:打工仔人人有樓收
打工仔辛辛苦苦捱餐死,無非都係要餵飽班地產霸權,等自己可以用成世人積蓄買到個安樂窩。好彩3月何俊仁做咗特首,工黨李卓人做財爺。阿人負責睇數,出手仲豪過電影《金雞2》裏面嗰位特首劉德華。阿人話過「天下為工」,參考咗當年民建聯話過要拎棟居屋出嚟抽獎嘅建議,於是喺五一勞動節當日宣佈開倉派米,動用儲備入市買樓送畀市民,打工仔人人有樓收,唔使捱死一世去供樓。阿人另一德政,就係宣佈重建深水埗,仲要原區安置基層居民,等佢哋可以繼續住喺市區,保留社區網絡之餘又易啲搵工,個個安居樂業。

Jun:狼振英維園悼六四
「但有一個夢,不會死,記着吧……」六四23周年,燭光由維園延伸開去,超過200萬人逼爆全港島,馬路全面封路,市民席地而坐高唱《自由花》。人群中竟然湧現一張「生面口」,喊得淒厲,似在懺悔。望真啲,原來係狼振英。吓,乜佢唔係唔清楚六四歷史嘅咩?點解又會嚟要求平反?

CCTVB請咗事旦男做燭光集會特約記者,舉牌問對方何以忽然熱血?含住淚嘅狼振英話佢終於諗起六四亡魂,喺鏡頭前振臂高呼「強烈譴責北京當局濫殺市民冷血暴行,沉痛哀悼為民主進步的中國而犧牲的愛國同胞」。事旦男另眼相看,改捧狼振英取代花哥做CCTVB新聞總監。

Jul:老江訪港搵王征握手
回歸15周年慶典,死去活來嘅江澤民蒞臨香港,表面係參與慶典,實則去書展搶購模寫真。賭王都要坐輪椅,老江竟然連枴杖都唔使揸,生龍活虎。佢為特首何俊仁監誓時特別贈言:「Too simple!Sometimes naive!」中氣較2000年喺人民大會堂發惡鬧寶華姐時有過之而無不及。
次次訪港都搵李超人陪食早餐嘅老江,今年有新伴登場。邊個可以取代李超人咁巴閉?當然係令老江人氣急升嘅亞視老闆王征啦!老江親切咁握住王征隻手,用半鹹淡廣東話高呼:「亞視嘅新聞,係得嘅!」王征呢鋪鹹魚翻生。

Aug:老廉查種票 有人金翅仆街鳥
過多一個月就係立法會選舉,今屆選舉全港市民都毋忘偉大嘅民主黨喺2010年為我哋成功爭取咗一人兩票,新增嘅五個地區直選議席,同埋五個區議會功能組別議席,成為各大黨兵家必爭之地。點知建制派種票種慣手勢,老廉今次為打大老虎,派出卧底神探潛伏於建制派陣營,成功掌握到佢哋種票嘅犯罪證據。
喺選舉前夕,佢哋採取代號「金翅仆街鳥」嘅拘捕行動,打殘建制派多個選票種植場,將多名建制派揸Fit人帶走調查。建制派出嚟反駁話,佢哋做嘅事又唔係大奸大惡啫,係做錯事但係冇做壞事囉,點解要咁樣針對佢哋呢?

Sep:民主黨壟斷功能組別
立法會選舉啱啱結束,今次泛民表現真係勁,先唔好理地區議席成績係點,最重要係佢哋竟然喺功能組別大勝!除咗傳統嘅教育、法律、社福同資訊科技呢幾個界別外,連會計、工程呢啲界別都贏埋,最神奇莫過於連飲食、紡織、旅遊甚至漁農界同鄉議局,都爆冷勝出。

連任失敗嘅自由黨張宇人喺台下大叫:「泛民可恥、泛民種票!我要投訴、誓不低頭!」八方立即問佢為乜咁勞氣?佢話有日見到李卓人喺屯門開檔賣魚蛋碗仔翅、李華明走去鯉魚門開海鮮酒家,最離譜係公民黨開連鎖法式快餐店,半年開成幾百間,咁樣唔係種票又係乜呀?

Oct:《天與地》擸艾美獎
香港班師奶唔識貨,好彩有老外捧場。美國佬早前買咗《天與地》劇集喺美國播出,大收旺場,特別係用食人嚟影射六四,睇到班鬼佬津津有味,擸埋艾美獎最佳劇情片、最佳導演、編劇同男女主角等大獎,為港爭光!
偉大祖國外交部唔係咁睇噃,發言人話艾美獎係表揚優秀電視製作,《天與地》已經俾國家廣電總局禁播,套劇惡毒攻擊八九年春夏之交那場風波,以企圖推翻中央政府作結,完全違背艾美獎嘅宗旨,簡直係褻瀆艾美獎。外國佬最終冇俾歪理蒙騙,諗住買埋版權拍《天與地》續集,男主角不二之選係王丹搭吾爾開希。

Nov:iCloud可同喬布斯溝通
別了喬布斯一年零一個月,蘋果電腦重新振作,新產品iPhone 5同iPad 3終於面世。iCould功能進一步提升,用家可以利用iCould,直接同天堂上嘅喬布斯溝通。蘋果電腦仲良心發現,今年妥善處理血汗代工廠嘅問題,提升工人待遇,做番間良心企業。點解新iPhone要喺年底先推出?咁蘋果電腦預咗係遲㗎啦,粉絲唔係唔等得嘛?聖誕前夕有新貨到,咪算對你好囉!

Dec:李氏力場頂住末日
根據瑪雅人預言,今年12月21日係世界末日。好多市民冇供樓幾個月,仲欠落一身卡數,大家都諗住喺呢日,無殼無卡一身輕。點知一齊等呀等,等到過埋凌晨12點,大家仲眼光光望月光,一切冇變喎。就喺大家好down嘅時候,聖誕老人竟然出現,唔通佢嚟送上末日願望?再睇真啲,原來係李超人扮㗎!
八方問佢:超人呀超人,點解世界末日仲未到?佢好溫柔咁同世人講:「嗱嗱嗱,世界末日同八號風球一樣,只要有李氏力場一日,都係唔會出現㗎!早啲瞓,準時返工,記得供樓,你層發水樓仲要供30年㗎!」香港人2013年繼續頂硬上。

Popular Posts